رحلت عشگ راحل ياچف أبو فـاضل
يالدافن ابالك علي وبعيونك الحسين
ــــــــــــــــــــــــــــــــــــــ
يمسلم يالعشگت الطف .. عشگ عباس للرايه
وابگلبك تشوف احسين .. ماتحتاج لامرايه
طريق الكوفه مايخلص .. يالخلصته بحچايه
قد قامت صلاة الحُب .. والـمذبح امصلايه
صلي انته وجروحك وافديـهم ابروحك
واترك حميده ابكربله تدعيلك بحنين
ــــــــــــــــــــــــــــــــــــــ
يالهايم ببو اليمه.. روح الذمه مبيوعه
ماتت بيهم الشيمه.. والأخلاق منزوعه
كالتمثال واحدهم.. مامفهوم موضوعه
كلهم وي عُبيد الله.. وانته اوياك بس طوعه
يالعايف ازهارك وانگطعت اخبارك
ماصادفتهم بالدرب أولادك الثنين
ــــــــــــــــــــــــــــــــــــــ
من سألوك عالصحراء.. ادموعك ظلّت اتجاوب
قصة عشگ گلتلهم.. موقصة فرس راكب
يالعمّك يسمونه.. عليّ ابن أبي طـالب
وعالعصابه الابراسك.. حسينا سيدي كاتب
يايوسف الثاني واستقبلك هاني
وخاطَر ابنفسه من أجل أمير المؤمنين
ــــــــــــــــــــــــــــــــــــــ
أتصور حالك المغرب.. وانته العاشگ الولهان
صَمتك بي سوالف طف.. وابوجهك أثر حرمان
حَضُر تجوال بالكوفه.. وبالشارع ولا انسان
وطاحت منهم الشيمه .. لـمّن سدّو البيبان
هم چنك المهدي خلفك ولا جندي
محّد يگلك ياهله ويبسطلك الادين
ــــــــــــــــــــــــــــــــــــــ
بالاتلاثين الف مرسال.. ودّولك يبو طاهر
تالي أمن القصر تنذب.. وحالك يكسر الخاطر
وتنجر بحــوافر خيل.. حافر يسند ابحافر
وماطلعو يدفنونك .. ولا يمّك وصل زاير
الوادم اتباوع والجثه بالشارع
ماتت شيمهم للأسف أهل الحميّه وين
ــــــــــــــــــــــــــــــــــــــ
عندك بالضعن لو مر..وردة ابهيئة أبنيّه
مچتوفه ابحبل واتصيح.. بس ابصوت حنيّه
فك باب الگبر وأگعد .. مسلم ياهوه الريّه
اتغير شكلي من الحر..وامدمايه رجليّه
يمك وگع حيلي والحادي يوميلي
ايگلي لقد حان السفر اعذرني يالحنين
محمد الجماسي
ليست هناك تعليقات:
إرسال تعليق