محمد الجماسي

سالفتي ماتت والشمع
مذبوح گدّامي   وانباگت أحلامي
         من مات جسّامي
ــــــــــــــــــــــــــــــــــــــ
عله افراگ الحبايب حيل مابيّه           
حزن گلبي مواكب بأربعينيّه
تره الفاگدله شايب يحزن اشويّه           
ما يبقه يعاتب دهره يوميّه

وانه ابني ابعمر الورد
اي ورد بس ضامي   وانباگت أحلامي     
          من مات جسّامي
ــــــــــــــــــــــــــــــــــــــ
تعب ذيج الليالي شالته إجنازه             
وألاُم يالغوالي أتريد الامجازه
الابن حسّبته تالي ايصير عكازه           
طفه الشمع اليلالي وفارگ اعزازه

والسالفه البيهه ذبح
تكرهها أيّامي     وانباگت أحلامي
        من مات جسّامي 
ــــــــــــــــــــــــــــــــــــــ
غشيم البصحاري أيدور الگطره           
چان الـماي جاري ودنيتي خضره
ليش الترس داري ابنوره وابعطره          
تالي بالظهاري اينام عالغبره

خلاني عالون واللطم
ما فِلّن احزامي     وانباگت أحلامي 
من مات جسّامي 
ــــــــــــــــــــــــــــــــــــــ
چان ايحب اديه الصبح والـمغرب          
خلاني سبيه وبالجروح احسب
شسوي يالـمنيه عرس لو موكب        
 خوش الغاضريه تعرف اتعزب

تاخذ الچنت اتنفسه
واتفزّز آلآمي   وانباگت أحلامي 
      من مات جسّامي
ــــــــــــــــــــــــــــــــــــــ
ياموت الاخذته ماخذيت أمه       
عالتربان شفته وسابح ابدمه
صاح ولطم گصته عالولد عمّه      
ياجسام انته امن الحسن ذمّه

ماشوف اجيتك بالدرب
تتعثّــر اجدامي     وانباگت أحلامي 
          من مات جسّامي
ــــــــــــــــــــــــــــــــــــــ
حتى بعين ربعه دمعة الأحـزان           
يم الباب قطعه دگّو الصُحبان
ماتت الف شمعه والشهيد انسان          
وابليلة الجمعه انوزع القربان

ظلمه الديار ابغيبتك
ياشمعة أيّامي     وانباگت أحلامي
          من مات جسّامي

محمد الجماسي