قصائد محرم /كتابه

محرم 1441هج يمفطوم بالسهام يمدلول اريدن اناغيك دلول يالزغير .. بس افراگك يغثني يالزغير .. گلبي اعليك يوجعني _____ فحطني سهم نحرك .. ليش الدم ترس صدرك زغير وركبتك ترفة ... النبلة اشمالها اتعورك عفت العافية بلونك .. ليش محومرة اعيونك بمتنك چان كاروكك .. هسه الدم عله امتونك بيمن اناغي يا عبد مهدك فرغ من جاستك ايد السهم نحرك نشغ وگماطك بلون الگطن دم انصبغ يگلبي الولد مات بالسهام وتبدت ضحكتة اعله الخيام يالزغير .. سهمك شيب شيبني يالزغير .. گلبي اعليك يوجعني __________ يبزري ويا حچي الجنة .. توها اسنونك امبينة عمرك توه ست اشهر .. منك كلشي ما شفنة الدمع برواحنة امشچل .. يالمعتبر يالمدلل يالمبلل نده و غبشة .. هظمة بدمك امبلل لون البياض بگصتك درّة نجف يمنشف رياج العطش ريجك نشف وجهك هذاك الهاشمي چنة اختلف عبد ليش جمالك تخرّب وگماطك صعب گوة ينظب يالزغير .. بصورّك عيني تهطرني يالزغير .. گلبي اعليك يوجعني _______ انچفن بالگاع كشخاتك .. السهم خانگها نسماتك المنية امفرفحة بريجك .. امچلبة بمگفة ضحكاتك ابوك ايدة بكتر خصرة ... وگامت توجعة الحسرة من شالاك صرتوا اثنين .. چنكم محبس وشذرة من شگ لهاتك فرفحت ذاك السهم دمك نزف والدم وصل يم الخيم وازاني بجفاك البچي وظهري انثلم ربابك يعبد الله ميتة النحر ذاك يبس دم رگبتة يالزْغير .. اليلچمنك يلچمني يالزْغير .. گلبي اعليك يوجعني ______ يالنادر يمتباهي .. عمت عين السهم فاهي اجاك وانت تضحكلة .. واشوفك حيل متراهي اجاك امفرفح ويذبح .. وگمت من الخيم ألمح لفاك وصيّحت عوفه .. زغير وليدي ما يصلح تلمع رگبتك ذهب لو گابل الشمس حار السهم وانت گمت بالحر تحس بكاروكك امدلل چنت تلعب امس عبد ليش يحرموني منك كمت انشد الخيمة عنك يالزغير .. ضعت بس انت تندلني يالزغير .. گلبي اعليك يوجعني ________ ذبحك صار بالگوة .. وبيد حسين تتلوة من احرورة الذبحة .. طلعت رجلك الحلوة جابوك وزهگ دربي .. وعيني التفتت لربي گبل لا يحفر حسينك .. گلتلة ايدفنك ابگلبي يايمة والله امن الدمع رمشي فحط بالحومة دمك يا عبد سواله شط چهبّني جنحين الحزن وبعيني حط يتالي التعب حمّل وراح صفة حيلي لسنون الرماح يالزْغير .. افراگك والله دولبني يالزْغير .. گلبي اعليك يوجعني ___________ علي هادي الخزعلي